mainit na mani ni manong

minsan, yung mga simpleng hirit, simpleng tao at mga simpleng pagkakataon ang nakakapagbigay ng kaligayahan sa atin. 

kung ikaw ay madalas sumakay sa mga bus sa Ayala MRT station, malamang ay nabibwisit ka na at naiirita sa ingay ng mga busina ng mga bus (minsan pa eto ang maririnig mo “FIRE! FIRE! FIRE! CHUG CHUG CHUG!!!!”, paulit-ulit yan hehe). o kaya naman, mahihilo ka sa init lalo na pag-rush hour na. mahihimatay ka din sa baho ng mga pader, dahil sa amoy ng ihi at sari-saring amoy na di mo alam kung saan nanggagaling. nag-aantay ka pa lang nyan ha…

pagpasok mo naman sa bus, minsan nakakairita din yung mga nagtitinda sa loob (alam kong naghahanap-buhay lang sila pero minsan may mga kalokohan din kasi eh). may isang nagtitinda ng dyaryo nun, isipin mo sobrang late na at pilit nyang pinapabasa sayo ang isang tabloid na dyaryong dala nya pagkatapos ay sisingilin ka nya. pipilitin ka talaga. kung di ka aware, eh mapapabili ka talaga. kainis diba.

NGUNIT AT DATAPWAT may mga ganitong eksena sa loob at labas ng bus, meron namang natatanging Tindero ng Mani ang namumukod tangi talaga. Ilang beses ko pa lang siya nakikita sa bus pero naikekwento na rin sakin ni Rye si Manong dahil mas madalas nya yun nun nakikita pag siya ay pauwi na. 

Pagkaunti lang ang pasahero, dun lang siya umaakyat sa bus. Di katulad ng iba eh halos makikipagsisikan din sa mga pasahero. 

Nakakatuwa at nakakatawa kasi ang mga dialogue nya sa pagtitinda. 

“Mani..mani.. mainit yan ho..iwas lang po ang mga kamay.. sobrang init nito.”

“Mani..mani..mani..wala pong betsin to, kaunting iodized salt lang po. ang iodized salt po ay mainam sa mga goiter at iba pang sakit… Mani..mani po..mainit to. iwas lang po ang mga braso nyo…”

“Mani po…ano pong gusto nyo? mas madaming bawang o mas madaming mani? yung iba po kasi mas gusto ang mas madami ang bawang.. Alam nyo po ba, mainam po ang bawang sa mga sakit lalo na sa mga senior diyan..”

“Mani..mani po..magkano po mam? Sampu o Bente?? Mabuti po ang mga mani sa mga bata pampatalino, pag-Bente po mas madaming medals, pag-Sampu..kaunti lang…”

Hehe..napa-ISMAYL talaga ako diyan. Napahagikgik din ako. Medyo napalakas nga eh..nagtinginan ang mga tao. =p Pero natawa din sila dahil bentang-benta talaga si Manong. Bentang-benta din ang tinda nyang mani, madami kayang bumili.

Kulit diba? Potensyalin si Manong maging komidyante. Potensalyin din na Salesman.=)